An Baho san Hubog

video by nairamenniet

Pakuronswelo

Ini tabi na mababasa niyo na mga patinawa puro ini hali doon saato, badi ngani an iba sini nabati na niyo…… kun kamo nagpapaburog sa plasa o kaya na naki-inoman basi narabasan na niyo ini. Bweno kay batogan ta na……puro lang tabi ini pakunswelo kun may-on man sin narabasan diri man tabi intotoyo, in-aayo ko an saiyo na pasensya.

AN PILI NAN KUYOG

May-on sadto sin magpadi na parabulangon doon kara balag, malin ngani an taga Naagtan yadto na dowa, an sayo sa magpadi, diri nagayod napipierdi kun nagbobolang, lintias pirmi gana. Kaya nangalas ini na sayo na padihon.Kun inhahapot man niya an sikreto kun nano kay diri napipierdi, diri man sa kaniya insasabi, sayo na Domingo san hali an dowa sa bulangan, sabi san sayo na padihon, padi matiano daw kun magdiyo-diyo kita kay pakul-awon ta ini na sambot ko,sabi man san sayo, ay lintian padi diri ako mahabo! San medyo intatamaan na an dowa san in-iinom na gin, hinapot san padihon niya an padihon kun nano an sikreto niya.kay hobog na, nadihanlas an dila san padihon, sinabi an sikreto sa padihon niya. Aram niyo kun nano?KUYOG Nangalas an padihon,sabi san padihon pan-o man nangyari? Sugad sini yoon padi, nagbakal ako kuyog na piso sa plasa, an sinupot na baga, niyan pag-ola-a ko sa mangko may-on pa sin sayo na buhay na kuyog, kaya nangalas ako, binutang ko sa garapon na may tubi, badaw payt baga an langoy san kuyog…… batog sadto bago ako magbolang inwiwirikan ko sin tubi na hali sa garapon na may kuyog an manok ko kaya di ako napipierdi.Aw mao, sabi san padihon.Otro Domingo bolang naman an dowa, an nakalaban niya na manok an sa padihon niya na sinabihan niya san sikreto niya, saka san binuhian na an manok, lintias primiro pa lang na siyapol, tinamaan tolos an manok niya, pierdi siya.Sabi niya, pan-o na nangyari, hinapot niya an padihon niya. Padi nano an hinimo kay napierdi mo ako?Simbag san padihon niya, magahom an kuyog sa PILI!!!Pinalangoy man angay-an an pili sa garapon ha ha ha ha.

MAYAMAN NAN POBRE

Nano an gahoy sa pobre na sige an pangatol? May kurekong!!! Kun mayaman, may allergy.An gahoy sa pobre na inboboang? Erhensya!! Kun mayaman, drug addict! Ha ha ha .

MOUNTAIN DEW

May taga uma sadto na nakadolhog sa bongto, sabi niya tadihan ko nagayod ini na Mountain dew.Pag-abot sa bongto bakal tolos sin Mountain dew, saka san igawgaw san tindera sa kaniya an bote san mountain dew, Sabi niya, aw paghona ko san Mountain dew sigarilyo, Cokes ngay-an.

MAPAN-OS NA LUTO

Sabi san padihon sa kaniya padihon, padi pan-o ka baga sini makaka-on sin mayad, pirmi mapan-os an luto namo.Aw diri yoon problema padi, nakakaon yoon na mapan-os na luto, aber pan-o man padi? Sapongon mo an irong mo, di ka maghangos pagtolon mo!!!

PA-MANILA

May –on sin soltero na mapa-manila, pag-abot sa gubat, hulat siya sin mga bus na mapa-Manila. Nag-abot ada an laki sa gubat, atab pa, mga alas dos sin hapon, lintianan gab-i na, yadto pa gihapon sa terminal an laki.. hinapot siya san sayo man didto na tambay.Pali makarin ka?Sabi niya,mapa-Manila! Gab-I na padi, nano kadaghan sadto na nag-aragi kangina na mga bus,wara ka nagayod pakasakay? Sabi man san laki, puro man yadto CUBAO-PASAY!!!!!!

Sadto nan Niyan

Nadomdoman ko san saragday pa kita pagdolom dolom dapat yadto na kita sa sulod san balay kay kun diri lapnitan ka ni pay mo, niyan saako naiimod pagdolomdolom mao pa lang nagkakaluwas ini na mga kabataan, lintian insisirigay na malin baga an mga siwo na natari … sadto pag pinangisgan ka ni may mo batia lang.. ayaw pagsisimbag kay kun di mo gusto na dumugo yoon na hiwa mo..niyan pangisgi an bata mo kay makaskas pa sa alas sinko kun sumimbag sin mag balagba. Pira ka kabeses sadto nakainom soon na mga coke o tsu-orange ( mao yoon an tama na pronounciation tabi san tru-orange san-o-na ha ha ha ) diri bilang sa guramoy mo? Niyan ini na mga bata na ini inlilimogmog lang san mga diyantre na ini…Mamay tagi man sin sinti kay ( di ka pa ngani nakatapos san sabihon mo ) sabi ni may saimo pira ko kabeses sasabihon saimo na wara kita sinti, niyan an mga surohayon na mga bata ayaw tagi sin sinti kay layasan ka...N adomdoman ko san –ona kun mapakaladkad ka sin tubi danggahan mun-a an iligotigot mo bago ka makapakaladkad kay nano? An mga mayaman lang san-ona an may shellane puro san-ona gatong, nya pan-o kay kun hulos an kahoy di nagdurolom an imod mo sin katatayhop? Bago maamak!

Sadto an tricy sa Gubat bilang sa guramoy mo niyan, diri daghan pa sa buhok mo, diri san nagbatogbatog kita sadto mag-inom an gin wara pa ngani sin sinko pesos an sayo? Niyan diri piso na lang (aw mayad kay bunarato ha) an bote pa lang yoon na wara sulod tabi ha ha ha. Sadto an uyag san mga bata taratsi-an dyorolenan, ereloyan, turubigan,trumpo nan kun minsan may-on man sin piriltikan nan kun nano nano pa, hain na yoon niyan na mga yoon? Wara naaaaaaaaaa… Kay nano? May-on sini na computer,,nintendo nan kun nano nano pa na mga kadadaghan, imoda kay kadaghanan san mga bata niyan may antipara,kay pan-o pirmi hampang doon sa computer! San-ona an libangan san mga tawo pag sabado nan domingo an pag deposito kara oga nan kara soya, SINE, irimod sine maski wara sin sinti…..aber niyan hain na an sinehan? Wara na kay malin intero na balay niyan may on sin telebesyon.. Sadto an isda in-aatado, niyan inkikilo na, may daya pa an kilohan he he he , An karne sadto nakatadi lang kami domingo, kay kun may sinti si papay na ibarakal, niyan maski oro-adlaw ka magkarne kay mas barato pa sa isda an presyo… an problema man soon kay nabentahon man an garter kara lagring kay mao ngay-an kuno yoon an bolong sa mga na-istrok dahil sa high blood( kay akay garter?) Aw inhihigotan na lang an tsinelas kay saog na baga soon an siki paglakaw ha ha ha.

Sabi san padihon ko sadto saako….mos kita padi sa uma kay basi makatadi kita sin linompan na native na manok… lintian baga pag-abot sa uma..ihaw man baga an tiyoon san padihon ko sin manok…sasabihon pa saimo pasensya na kamo nono kay wara kami pakadolhog niyan kaya manok na lang ini na suda niyo… Niyan kadto sa uma kay pasodaon ka na lang sin sardinas kay tinakwaw an manok ha ha Sadto magianon an pagbuhay doon saato, wara ka sin balatong pwede ka mag-ayo sa kararani niyo wara ka sin lobi,dahon kamote,kapayas o kun nano na mga nakatanom sa natad pwede ka mag-ayo. Niyan pwede pa man gihapon kaya lang hanggan dowa o tolo kabeses lang, kay an ika-opat, Nano baga an sasabihon saimo? Pagtanom mannnn!!!! Kun may mga project san-ona insusurat lang sa kamot..o indrodrowing lang, maswerte ka kun namakinilya an project mo. Niyan intero na hali sa computer.. kaswerte san mga bata niyan kaya lang di naman nira naabutan an mga kalinawan san dagat nato nan kadianisan san ato mga kadlagan san-ona. Daghanon pa tabi an iyo mababasa dini kaya lang kunolog na an ako kamot ko sin kadodokdok sini na computer, Sa mahonod naman,pagtaga-taguba lang niyo ini na blogspot ko kay basi madomdoman man niyo an saato naka-agi agi. Sa niyan salamoton na daghan sa iyo pag-agi.

Diyos mabalos saato intero!